2012年7月29日 星期日

壹周刊:青年宿舍無鬼用

青年宿舍無鬼用
壹周刊
A080-082 時事
壹些事壹些情 2012-07-26

特首梁振英上週一在立法會答問大會上突然宣布將撥款十億公帑興建青年宿舍,並以市值租金的一半至六成租予十八至三十五歲年輕人,又批出五千名額,容許白表申請人免補地價購買居屋,以求減低年輕人戾氣。政策一公布,以為是超級福利,個個磨拳擦掌表明屆時一定要申請,甚至有網民表示會租住青年宿舍作「炮房」、「遊樂場」;不過,本刊訪問了多名八十後年輕人,發現青年宿舍對他們全無吸引力,政策的構思更凸顯政府完全沒有周詳策劃。

住五年就會儲到首期?

廿六歲的KaKa,家住上水,由於跟弟弟同於港島區上班,為求節省車費和交通時間,兩姊弟遂每月以六千元合租銅鑼灣的貴價劏房,「同細佬一齊瞓碌架床,有時換衫都唔方便,惟有加塊簾,換衫時拉埋佢。」她跟男朋友Teddy拍拖九年,早有結婚打算,但卻一直未儲夠首期。「一個月萬二蚊人工,交租同俾家用都已經用咗半份糧,一個月最多儲三千蚊,要儲幾耐先買到樓?」KaKa的男朋友月入約二萬元,他坦言不想結婚後租樓住「幫人供樓」,所以才遲遲未結婚,「銀行而家咁低息,供樓根本就唔會好大壓力,最大問題係樓價太高,俾唔到首期。如果我哋夠錢上車,聽日就走去結婚啦。」「本來諗住梁振英上場,真係會令樓市降溫,點知呢頭話推置安心同青年宿舍,轉過頭又話白表可以免補地價買居屋,樓價一星期內又升十幾萬,政策前後矛盾,根本就俾唔到人信心!」青年宿舍可讓年輕夫婦申請入住,但二人卻耍手擰頭道:「結婚就係為咗組織一個家庭,唔通生個仔出嚟,叫佢同我哋一齊屈埋喺個百幾呎嘅宿舍度?最大問題係,住完五年係唔係就會儲到首期?」

起多啲公屋

廿七歲的Carol家住長洲,五年前出來工作後,便一直租住劏房,現每月以四千五百元,租住深水埗約二百呎劏房,「我租過土瓜灣、佐敦、沙田,出嚟住耐咗,真係寧願遠啲都想返屋企住,但係屋企根本就冇位。」Carol任職文員,月薪九千五百元,單是屋租已佔收入一半,加上晚上兼讀護士課程,生活捉襟見肘,「而家食碗麵都三十蚊,乜都唔買,每個月先叫儲到一千蚊,買樓?真係諗都唔使諗。」青年宿舍雖說會較市值租金便宜一半,但她卻認為未必真如想像中化算,「我而家四千五百蚊乜都包晒,青年宿舍話就話啲租平一半,但就唔包水電,仲要加埋管理費同差餉,其實平得幾多?五年之後儲到幾多錢?」她又擔心青年宿舍的治安問題,「我揀劏房都要揀啲有鐵閘嘅,十八歲到三十五歲個range咁大,都唔知隔籬會住啲咩人。」她批評政府遲遲未肯加建公屋,才令年輕人陷入困境:「兩年前我人工得七千幾,走去申請單人公屋,點知等咗咁耐,連主任都冇得見。起得呢啲青年宿舍,倒不如起多啲公屋,真真正正解決到住屋問題!」

台灣青年宿舍無人吼

年輕人置業難,並非香港獨有問題,台北市政府早於O九年在市區興建「青年國宅」,以市值租金七成,租予二十至四十歲的年輕人,租期最長六年,今年初已開始推行。不過,由於計算管理費後,租金雜費每月高達五千元港幣,年輕人難以負擔,所以宿舍的空置率極高。北京去年亦推出類似政策,計劃在市區興建五百間出租房,以市租金的三分一價錢出租予年輕人。出租房的設計參照大學宿舍,每戶有兩間睡房,租戶須共用廚房及廁所。

仲要俾人管

剛剛三十歲的Cherry與丈夫及父母同住一公屋單位,雖然有意搬離父母過二人世界,但仍覺青年宿舍不吸引。「宿舍同市值租金掛鈎,話就話平近半,但我同老公夾埋都係二萬幾蚊人工,兩邊父母每個月夾埋要俾八千蚊家用,而家返工已經要帶飯慳錢,仲邊有錢交千幾二千蚊租?」她更認為青年宿舍只是另類劏房,「仲要俾人管,聽落咁大個人仲要住宿舍,好似係有問題嘅人先會入去住咁。」

谷肥俾地產商劏

「宿舍最多俾人住五年,但五年之後呢?我又會夠錢買樓咩?你當我俾三成首期,都要七十萬啦,五年點儲七十萬?」已畢業投身社會十年、從事藝術行政工作的楊先生,一聽到青年宿舍計劃便鬧爆,認為政策幫不到青年。現居於深水埗劏房單位的他,認為政策最終受惠的只是地產商及有份營運宿舍的機構:「就算我五年後真係儲夠錢買私樓,最終辛苦儲番來嘅錢都係落地產商袋,呢五年係谷肥青年俾地產商劏啫。有份run宿舍嗰啲機構(青協、東華三院、香港女童軍總會)背景都紅紅哋,佢哋唔使出錢起樓,自己可以營運,仲有機構話會考慮叫住宿舍啲人幫佢哋做義工,仲唔賺晒?」

全港三千個宿位

青年宿舍將由政府撥款十億元興建,並交由非政府機構營運,宿舍地點包括天后、上環、佐敦及大埔等,合共三千個單位,以市值租金一半至六成,即約一千二百元至二千五百元,租予十八至三十五歲的在職單身人士及夫婦。單身人士月入少於一萬七千元即可申請,最多可住五年,有關宿舍最快兩年後落成。計劃興建的單位每個面積不多於二百呎,目前青協、東華三院及香港女童軍總會已表明有意營辦,運作形式會類似大學宿舍,會設立宿舍委員會或舍監負責監管。

沒有留言:

張貼留言