政情：《明報》又出錯 屈人撐居屋

東方日報
A12  |   政情 2011-07-17

自詡「公信第一」嘅《明報》又出錯！本報讀者尋日來電，踢爆《明報》A2版刊登咗一張「拒當樓奴」成員前日去立法會門外請願嘅相片，圖片說明指呢班請願人士要求復建居屋，好明顯完全搞錯晒。根據當日現場所見，其實呢班請願人士係話復建居屋解決唔到低下層嘅住屋問題，反而要求大量興建公屋，咁先至係對症下藥。

「拒當樓奴」成員嘅橫額大大隻字寫明「只要公屋」，點解《明報》話人哋要求復建居屋？ （資料圖片）

本報尋日問過「拒當樓奴」成員之一嘅楊先生，佢話對《明報》呢啲傳媒錯誤傳遞佢哋嘅訴求感到相當遺憾，因為佢哋當初決定行出嚟提出呢個非主流意見，需要鼓起好大勇氣，點知該報一次出錯，即時搞到佢哋嘅行動付諸一炬，佢認為該報起碼要公開澄清同解釋喎。

又好難怪呢班成員咁勞氣，事關當日佢哋拉起嘅橫額，大大隻字寫住「只要公屋」，《明報》咁都搞錯，仲自詡係公信第一喎，好心冇鏡就搵盆水照吓啦！