2013年1月17日 星期四

【報摘】爽人物:80後青年 寧做怪胎不當樓奴

《蘋果日報》
青年拒當樓奴 促建公屋救基層
2013-01-17

年輕大學生未畢業預先申請公屋,成為香港高樓價下畸形的時代產物,嶺南大學文化研究系三年級學生唐耀強,就自嘲自己是典型「畸胎」!捱低薪儲足三年錢重返校園讀大學,他去年就以單身名義,搶閘入紙申請輪候公屋;又與數十名無殼青年,組成「青年拒當樓奴運動」民間組織,揚言不租不買,不是要與阿婆爭上樓,只是希望為自己、為那些真正無能力買私樓的人發聲,向不合理的高樓價說不!記者:呂麗嬋

「我知道外界對我哋呢班排定公屋嘅80後評價好負面,覺得我哋年紀輕輕,就要同啲老人家及有需要嘅人爭上樓。但我想講有頭髮邊個想做癩痢?讀大學搵份好工、想置業安居成家立室,人之常情,但喺香港,呢啲咁平凡嘅要求已經係好多人遙不可及嘅夢想。2006年,我喺職訓局商科文憑畢業,同好多人一樣,學歷唔夠,想做一陣嘢儲筆錢再讀書。

之後三年,我做過四份工:律師樓文員、教育局外判文職、地區幹事,又試過全職幫人補習。每份工平均月薪6,000蚊、最高都唔過8,000蚊。呢筆錢要應付每月交通費零用錢同職訓局筆學費貸款,仲要儲錢讀大學已經好勉強,如果要儲埋筆首期,追埋𠵱家啲樓價,更加係天方夜譚。好在屋企人體諒,家用只係象徵式畀少少,叫做負番基本家庭責任就算。

對比嗰啲一家幾口逼喺百呎劏房嘅家庭,我算好彩,屋企唔富裕,但點都叫做有間仲有十年先供完嘅居屋,可以一家人住。只係我對上有兩個阿哥,佢哋要結婚生仔、有自己家庭。住喺邊?有冇能力搬出去?係好現實嘅問題。上年我屋企就開咗個家庭會議,我最細、冇女友,資產同收入又未過上限,決定由我以單身名義申請公屋先,機會幾渺茫都好,買個希望咁解。

「高官知唔知民間疾苦?」

透過大學聚會同網上討論區,發現原來好多人嘅處境好似,大家一人一句,由學債講到搬出嚟住,甚至置業,人人一肚氣。買樓交唔出首期,唔想一世做樓奴;租樓又變相幫人供,搵自己笨;預先排公屋,又俾人話霸資源,仲要遙遙無期。冇出路,要搬出去住,租住劏房成為唯一選擇!所以聽到高官話劏房環境唔錯,我特別火滾,究竟佢哋知唔知民間疾苦?

我知道公屋輪候冊排大隊,嚟緊大趨勢係會收緊單身年輕人申請公屋嘅資格,但點都好,我哋呢班人都好想為自己發吓聲,就算俾你鬧我同阿婆爭上樓都冇計。我只係想講,如果大學生未畢業,預先申請公屋,係高樓價下嘅怪胎,咁劏房就係施政失誤下嘅魔鬼怪嬰。我希望啲高高在上嘅官員,唔好再話劏房好住,起多啲公屋,先係真正對症下藥。」

沒有留言:

張貼留言